نبذة عن الكاتب نجيب محفوظ




نجيب محفوظ

اتولد ديسمبر سنة 1911م، "نجيب محفوظ" دا اسم مُركب يعني دا اسمه لوحده مش اسمه واسم أبوه .. والده سماه على اسم الدكتور المعروف نجيب باشا محفوظ اللي اشرف على والدتها اللي كانت متعسرة، اسم والده "عبدالعزيز إبراهيم"

اتولد في الجمالية بالقاهرة، والده كان موظف واللي عمره ما قرأ كتاب غير ديث عيسى بن هشام (بعد القرآن) وقرأه مش رغبة في العلم أو الأسباب دي.. السبب إن الكاتب كان صديقه "الموحيلي".. ادي الأصدقاء ولا بلاش
والدتها كانت بنت الشيخ مصطفى قشيشة من علماء الأزهر، كان أصغر إخواته، ولإن الفرق بينه وبين أقرب اخواته سنًا كان حوالي 10 سنين فكان بيتعامل كأنه الطفل الوحيد

لما كان عنده 7 سنين تقريبًا قامت ثورة 1919 واللي ظهرت فـ أول أجزاء الثلاثية "بين القصرين"

دخل جامعة القاهرة سنة 1930م وأخد ليسانس الفلسفة، وكان هيعمل ماجيستر في جمال الفلسفة الإسلامية لكنه تراجع عن رأيه وقرر يشتغل ويهتم بالأدب.

اتوظف واشتغل فـ عدة مناصب أولها سكرتير برلماني في وزارة الأوقاف، وأخر منصب تولاه كان رئيس مجلس إدارة المؤسسة العامة للسينما من 1966 لـ 1971م

اتجوز في فترة توقفه عن الكتابة بعد ثورة 52، وفضل مخبي موضوع جوازه لحوالي 10 سنين، وبقى يتحجج بانشغاله بالاهتمام بوالدته وأخت الأرملة وأطفالها، وخلال الفترة دي زاد دخله وعمله من كتابة سيناريوهات الافلام وبقى عنده فلوس تساعده فـ تأسيس عيلة وأسرة.

وبما إن "مافيش حاجه بتستخبى" فبعد 10 سنين اتعرف موضوع جوازه بالصدفة، بإن بنته اتخانقت مع واحدة صاحبتها، ووالد البنت كان يعرف صلاح جاهين وقاله على إن نجيب محفوظ عنده بنت واتعرف موضوع جوازه وانتشر في الوسط

بدأ يكتب في منتصف التلاتينات لكن ماحدش اهتم بأعماله غير في الخمسينات، وبعد كتابته للثلاثية دخل في حالة صمت أدبي، وخلال الفترة دي تحول من الواقعية الاجتماعية إلى الواقعية الرمزية، واللي تمثلت فـ أولاد حارتنا، اللي بدأت تنزل على حلقات في جريدة الأهرام سنة 1959م، فيها استسلم نجيب لغواية استعمال الحكايات الكبري من تاريخ الإنسانية في قراءة اللحظة السياسية والاجتماعية لمصر ما بعد الثورة ليطرح سؤال على رجال الثورة عن الطريق الذي يرغبون في السير فيه (طريق الفتوات أم طريق الحرافيش ؟)

واتسببت الرواية دي فـ ردود أفعال قوية ومعارضة لنجيب من التفسيرات المباشرة للرموز الدينية في الرواية، وشخصياتها أمثال: الجبلاوي، أدهم، إدريس، جبل، رفاعة، قاسم، وعرفة. وشكل موت الجبلاوي فيها صدمة عقائدية لكثير من الأطراف الدينية، واتوقف نشرها فـ مصر، لكن دار الآداب اللبنانية نشرتها كرواية كاملة (لكنها فضلت ممنوعة في مصر لحد وقت قريب، دار الشروق نزلتها سنة 2006م فـ مصر)

ورغم كل المعارضة دي فـ أولاد حارتنا كانت ضمن الأربع روايات اللي تسببوا فـ حصوله على جائزة نوبل ويتحول لأول عربي يحصل على الجايزة دي في الأدب
والرواية دي ما أثرتش ضده معارضة وبلبلة بس لا كمان دي أحد الأسباب التي يُقال إنها كانت ورا محاولة اغتياله

ورغم كل دا ما تخلاش عن الواقعية الرمزية في حياته وكتب ملحمة الحرافيش بعد 10 سنين من نشر أولاد حارتنا كاملة

وكان معروف عنه عدم حبه للسفر، لدرجة أنه أوفد بنته عشان تجيبله جائزة نوبل !، لكنه سافر مع وفد كتّاب في الستينات، وسنة 1989م راح لندن عشان يعمل جاحة في القلب

في أكتوبر 1995م حاول شابين قتله، طعنوه في رقبته لاتهامه بالكفر والخروج عن الملة بسبب روايته المثيرة للجدل، لكن محاولتهم فشلت واتحكم عليهم بالإعدام، ونجيب صرح إنه مش حاقد عليهم واتمنى إنهم ما اتعدموش

وعدم طباعة أولاد حارتنا فـ مصر كان نتيجة وعد قطعه نجيب على نفسه للممثل الشخصي للرئيس الراحل جمال عبدالناصر بإنه مش هينشرها فـ مصر إلا بعد موافقة الأزهر، ورغم انها اتطبعت برا إلا إن دا ما منعش تهريبها إلى داخل مصر

وفي فترة وجوده في المستشفى زاره محمد الغزالي (اللي كان من أشد المعارضين والممانعين لنشر الرواية) وعبدالمنعم أبو الفتوح القيادي السابق في حركة الإخوان المسلمين والزيارة دي اتسببت في مهاجمة المتشددين لأبو الفتوح.

بعد 20 يوم من دخوله المستشفى فـ2006 م، اتوفى نتيجة قرحة نازفة لإصابته بمشكلات صحية في الرئة والكليتين. وكان قبلها قد دخل المستشفى في يوليو من العام ذاته لإصابته بجرح غائر في الرأس إثر سقوطه في الشارع.

من طقوسه في الكتابة:
يستمع إلى الموسيقى قبل الكتابة، وفي أثنائها، ويشرب القهوة ويدخن كثيرا.

#الروايات اللي كتبها:
(مصر القديمة - عبث الأقدار - رادوبيس - كفاح طيبة - القاهرة الجديدة - خان الخليلي -زقاق المدق - السراب - بداية ونهاية - ثلاثية نجيب محفوظ - اللص والكلاب - السمان والخريف - الطريق - الشحاذ - ثرثرة فوق النيل - ميرامار - أولاد حارتنا - المرايا -الحب تحت المطر - الكرنك - حكايات حارتنا - قلب الليل - حضرة المحترم - ملحمة الحرافيش - عصر الحب - ليالي ألف ليلة - أفراح القبة - الباقي من الزمن ساعة - أمام العرش - رحلة ابن فطومة - العائش في الحقيقة - يوم مقتل الزعيم - حديث الصباح والمساء - قشتمر)

#القصص_القصيرة:
(همس الجنون - دنيا الله - بيت سيء السمعة - خمارة القط الأسود - تحت المظلة - حكاية بلا بداية ولا نهاية - شهر العسل - الجريمة - الحب فوق هضبة الهرم - الشيطان يعظ - رأيت فيما يرى النائم - التنظيم السري - صباح الورد - الفجر الكاذب - أصداء السيرة الذاتية -القرار الأخير - صدى النسيان - فتوة العطوف - أحلام فترة النقاهة)

دي بعض أقوال نجيب محفوظ
وأعمال متفرقة ليه



لمناقشة الكتاب : جروب أطلب كتابك
لتحميل المزيد من الكتب ، او اطلب كتاب : موقع اطلب كتابك

كمثقف انشر الكتب بين اصدقائك على

الفيسبوك تويترجوجل بلس
روابط التحميل كلها تعمل ، ولكن مع الوقت تقوم خوادم جوجل درايف او فورشيرد او ميديافاير بحذفها ، لذا نرجو منك ترك تعليق بالاسفل هنا ، وسنقوم بتجديد الرابط ،

تنويه : اذا وجدت رابط لا يعمل ، كتاب له حقوق ملكية ، او اردت نشر كتاب او مقال خاص بك على الموقع : راسلنا عن طريق رسائل صفحة أطلب كتابك

عن الموقع

الموقع تابع لجروب اطلب كتابك ، نرجو منك متابعتة على فيسبوك